తిరుమల శ్రీవారి భక్తులకు టీటీడీ ఒక ముఖ్యమైన ప్రకటన చేసింది. భక్తులు అత్యంత శ్రద్ధగా చేసుకునే అంగప్రదక్షిణ టోకెన్ల జారీ విధానంలో కీలక మార్పులు చేసింది. ఇప్పటివరకు 'ఫస్ట్ ఇన్ ఫస్ట్ అవుట్' పద్ధతిని అనుసరిస్తున్న విధానాన్ని రద్దు చేసి, ఇకపై భక్తుల టోకెన్లు ఆన్లైన్ లక్కీ డిప్ ద్వారా కేటాయించబడనున్నాయి.
ఇప్పటివరకు సుప్రభాతం, తోమాల, అర్చన, అష్టదళ పాదపద్మారాధన వంటి ఆర్జిత సేవలకు ఇప్పటికే టీటీడీ ఆన్లైన్ లక్కీ డిప్ విధానాన్ని అమలు చేస్తోంది. ఇప్పుడు ఈ జాబితాలో అంగప్రదక్షిణ సేవను కూడా చేర్చింది. భక్తులు డిసెంబర్ నెలకు టోకెన్ల కోసం సెప్టెంబర్ 18 నుంచి 20వ తేదీ వరకు ఆన్లైన్లో రిజిస్ట్రేషన్ చేసుకోవాలి. లక్కీ డిప్లో ఎంపికైన భక్తుల వివరాలను వెల్లడించి, వారికి టోకెన్లు కేటాయిస్తారు. శుక్రవారం మినహా మిగిలిన రోజుల్లో 750 టోకెన్లు, శనివారం 500 టోకెన్లు అందుబాటులో ఉంటాయి.
తీరి, ఒక కీలక నిబంధన కూడా అమలులోకి వచ్చింది. గతంలో ఒకసారి అంగప్రదక్షిణ సేవలో పాల్గొన్న భక్తులు మళ్లీ 90 రోజుల తర్వాతే బుక్ చేసుకునే అవకాశం ఉండేది. అయితే, ఎక్కువ మంది భక్తులకు అవకాశం కల్పించే ఉద్దేశంతో ఈ గడువును 180 రోజులకు (6 నెలలకు) పెంచినట్లు టీటీడీ ప్రకటించింది.
