హైదరాబాద్ను ముంచెత్తిన భారీ వర్షం: తెలంగాణకు 2 రోజుల వర్ష సూచన
హైదరాబాద్ నగరాన్ని భారీ వర్షం ముంచెత్తింది. గురువారం రాత్రి మొదలైన వాన ఈ రోజు ఉదయం కూడా ఎడతెరిపి లేకుండా కురుస్తూనే ఉంది. బంజారాహిల్స్, జూబ్లీహిల్స్, పంజాగుట్ట, అమీర్పేట, సికింద్రాబాద్, ఎల్బీనగర్ వంటి ప్రాంతాల్లో రోడ్లపై నీరు నిలిచిపోవడంతో వాహనదారులు తీవ్ర ఇబ్బందులు పడుతున్నారు. కోఠి, మొజంజాహీ మార్కెట్ పరిసరాల్లో విద్యుత్ సరఫరాకు అంతరాయం ఏర్పడింది.
అల్పపీడన ప్రభావం
బంగాళాఖాతంలో ఏర్పడిన అల్పపీడనం వర్షాలకు కారణమని హైదరాబాద్ వాతావరణ కేంద్రం తెలిపింది. ఈ అల్పపీడనం శుక్రవారం వాయుగుండంగా బలపడి, శనివారం దక్షిణ ఒడిశా-ఉత్తరాంధ్ర తీరం వైపుగా పయనించే అవకాశం ఉంది. దాంతో రాష్ట్రవ్యాప్తంగా శుక్ర, శనివారాల్లో భారీ నుంచి అతి భారీ వర్షాలు కురుస్తాయని అధికారులు అంచనా వేస్తున్నారు.
పలు జిల్లాలకు హెచ్చరికలు
శుక్రవారం ఆదిలాబాద్, కుమ్రంభీం, ఆసిఫాబాద్, మంచిర్యాల, నిర్మల్, నిజామాబాద్, భూపాలపల్లి, ములుగు, కొత్తగూడెం, వరంగల్ జిల్లాలకు ఎల్లో అలర్ట్ జారీ. శనివారం నిర్మల్, నిజామాబాద్, వికారాబాద్, సంగారెడ్డి, మెదక్, కామారెడ్డి, మహబూబ్నగర్ జిల్లాలకు ఆరెంజ్ అలర్ట్ ప్రకటించబడింది.
ప్రభుత్వం అప్రమత్తం
వాతావరణ హెచ్చరికల నేపథ్యంలో సీఎం రేవంత్ రెడ్డి జిల్లా కలెక్టర్లతో సమీక్ష చేసి కీలక ఆదేశాలు జారీ చేశారు. లోతట్టు ప్రాంతాల ప్రజలను అవసరమైతే సురక్షిత ప్రాంతాలకు, పునరావాస కేంద్రాలకు తరలించాలని సూచించారు. జీహెచ్ఎంసీ, జలమండలి, పోలీసులు సమన్వయంతో పనిచేయాలని ఆయన ఆదేశించారు.
