అమెరికాలో భారతీయ విద్యార్థులకు పెరుగుతున్న సవాళ్లు
అమెరికాలో పరిస్థితులు మారిపోతున్నాయి. డొనాల్డ్ ట్రంప్ అధ్యక్ష పదవిలో రెండోసారి బాధ్యతలు చేపట్టిన తర్వాత, అమెరికాలో వలస విధానాలు కఠినంగా మారాయి. దీనితో పాటు వీసా నిబంధనలు, జీవన వ్యయాల పెరుగుదల, ఉద్యోగ అవకాశాల తగ్గుదల వంటి అంశాలు భారతీయ విద్యార్థులపై తీవ్ర ప్రభావం చూపుతున్నాయి.
కొంతమంది విద్యార్థులు అంటున్నారు—"సాధారణమైన ట్రాఫిక్ రూల్స్ ఉల్లంఘించినా వీసాలు రద్దవుతున్నాయి. సోషల్ మీడియాలో ప్రభుత్వం వ్యతిరేకంగా పోస్టులు పెడితే కూడా ఇబ్బందులు వస్తున్నాయి."
ఒక విద్యార్థి ఆవేదన వ్యక్తం చేస్తూ చెప్పాడు:
"చిన్న తప్పు జరిగినా వీసా పోతుందనే భయం. మా భవిష్యత్తు అర్థంకాకుండా మారింది."
ఇంకొక విద్యార్థి వివరించాడు—"మా స్నేహితుడు ట్రాఫిక్ రూల్ బ్రేక్ చేసినందుకు వీసా రద్దయింది. అతను వెంటనే భారత్ వెళ్లాల్సి వచ్చింది. ఇది చాలా అన్యాయంగా ఉంది."
అంతర్జాతీయ విద్యార్థుల వీసా రద్దుల కేసులు కొన్ని అమెరికన్ కాలేజీలు ధృవీకరించాయి. ముఖ్యంగా భారతీయ విద్యార్థులు అధికంగా ప్రభావితమవుతున్నారు. చదువు ఖర్చులు—ట్యూషన్, వసతి, ఆహార వ్యయాలు—విపరీతంగా పెరగడం వల్ల చాలా మంది ఆర్థికంగా ఇబ్బందులు ఎదుర్కొంటున్నారు.
చదువు పూర్తయ్యాక ఉద్యోగం పొందడం కూడా కష్టంగా మారింది. వీసా నిబంధనలు కఠినంగా ఉండటం, కంపెనీలు విదేశీయులను తీసుకోవడంలో వెనకడగడం వల్ల అవకాశాలు తగ్గిపోతున్నాయి. విద్యార్థులు భారత ప్రభుత్వం నుంచి మద్దతు కోరుతున్నారు, వీలైనంత త్వరగా సమస్యలను పరిష్కరించాలని కోరుతున్నారు.
