అమర్నాథ్ యాత్రలో పాల్గొనే యాత్రికుల భద్రత కోసం జమ్మూ కశ్మీర్ ప్రభుత్వం కీలక నిర్ణయం తీసుకుంది. జూలై 1 నుంచి ఆగస్టు 10 వరకు అమర్నాథ్ యాత్ర మార్గాల్లో నో-ఫ్లై జోన్ అమలు చేయనున్నారు. ఈ కాలంలో డ్రోన్లు, బెలూన్లు, ఇతర విమాన సామగ్రిని వినియోగించరాదు. యాత్రలో పాల్గొనే భక్తుల రక్షణ కోసం కేంద్ర పాలిత ప్రాంత హోం శాఖ ఈ ఆదేశాలు జారీ చేసింది.
ఈ సంవత్సరం యాత్ర జూలై 3న ప్రారంభమై ఆగస్టు 8న ముగియనుంది. ఇటీవల ఉగ్రవాద ముప్పు నేపథ్యంలో ఇది చాలా కీలక యాత్రగా మారింది. ఏప్రిల్ 22న పహల్గామ్లో జరిగిన ఉగ్రదాడి, మేలో భారత్-పాకిస్థాన్ మధ్య ఘర్షణలు వల్ల పరిస్థితులు ఉద్రిక్తంగా మారాయి. అందుకే నో-ఫ్లై జోన్ విధించామని అధికారులు తెలిపారు.
యాత్రికుల రక్షణ కోసం 50,000 మందికిపైగా భద్రతా సిబ్బందిని మోహరించారు. ఆపరేషన్ శివ పేరిట రోడ్ ఓపెనింగ్, ఐఈడీ చెకింగ్, బాంబ్ స్క్వాడ్లతో చర్యలు చేపడుతున్నారు. మొదటిసారి జామర్లు కూడా కాన్వాయ్కు రక్షణగా ఉపయోగించనున్నారు. ఈ చర్యలతో హిమాలయ పుణ్యక్షేత్రానికి వచ్చే భక్తులకు సంపూర్ణ భద్రతను అందిస్తామనే నమ్మకం అధికారులు వ్యక్తం చేస్తున్నారు.
