హైదరాబాద్‌, మే 9: తెలంగాణ రాష్ట్ర వ్యాప్తంగా ఇంజనీరింగ్‌, అగ్రికల్చర్‌ స్ట్రీమ్‌ ఈఏపీసెట్‌ 2025 ఆన్‌లైన్‌ పరీక్షలు మే 4తో ముగిశాయి. ఈ పరీక్షలకు సంబంధించిన ప్రాథమిక కీ తాజాగా విడుదలైనట్లు తెలుస్తోంది. అభ్యంతరాలను స్వీకరించిన అధికారులు, తుది కీను రూపొందించగా, ఈఏపీసెట్‌ ఫలితాల విడుదలకు సంబంధించిన ముహూర్తం ఖరారు చేశారు.

ఈ మేరకు, మే 11 (ఆదివారం) ఉదయం 11 గంటలకు, తెలంగాణ రాష్ట్ర ముఖ్యమంత్రి రేవంత్ రెడ్డి చేతుల మీదుగా ఈఏపీసెట్‌ ఫలితాలను విడుదల చేయనున్నారు. విద్యార్థుల ర్యాంకులు, మార్కుల జాబితాను కూడా అదే సమయంలో విడుదల చేయాలని అధికారులు ప్రకటించారు. ఇంజనీరింగ్‌, అగ్రికల్చర్‌-ఫార్మసీ విభాగాలకు సంబంధించిన ఫలితాల విడుదలకు సంబంధించి అధికారులు అన్ని ఏర్పాట్లు పూర్తి చేశారు.

తెలంగాణలో ఈఏపీసెట్‌ 2025 పరీక్షలు ఏప్రిల్ 29 నుండి మే 4 వరకు ఆన్‌లైన్‌ రాత పరీక్షల రూపంలో నిర్వహించబడ్డాయి. ఏప్రిల్ 29 మరియు 30 తేదీల్లో అగ్రికల్చర్‌ మరియు ఫార్మసీ ప్రవేశ పరీక్షలు జరిగి, మే 2 నుండి 4 వరకు ఇంజనీరింగ్‌ స్ట్రీమ్‌ పరీక్షలు జరిగాయి. ఈఏపీసెట్‌ ఇంజనీరింగ్‌ విభాగానికి 2,20,327 మంది దరఖాస్తు చేసుకున్నారు, అందులో 2,07,190 మంది (94.04%) పరీక్షకు హాజరయ్యారు.

అగ్రికల్చర్‌ విభాగంలో 86,762 మంది దరఖాస్తు చేసుకున్నప్పటికీ, 81,198 మంది (93.59%) పరీక్షకు హాజరయ్యారు. మొత్తం రెండు విభాగాలకు దాదాపు 3 లక్షల మంది విద్యార్థులు పరీక్షలకు హాజరయ్యారు.