భారీగా పతనమైన దేశీయ స్టాక్ మార్కెట్లు: బీఎస్ఈ సెన్సెక్స్ 800 పాయింట్లకు పైగా క్షీణించటం
భారత్-పాకిస్థాన్ మధ్య ఉద్రిక్తతలు తీవ్రమైన నేపథ్యంలో శుక్రవారం ఉదయం భారత స్టాక్ మార్కెట్లు భారీ అమ్మకాల ఒత్తిడికి లోనయ్యాయి. బాంబే స్టాక్ ఎక్స్ఛేంజ్ (బీఎస్ఈ) సెన్సెక్స్ 800 పాయింట్లకు పైగా పతనమవ్వగా, నేషనల్ స్టాక్ ఎక్స్ఛేంజ్ (ఎన్ఎస్ఈ) నిఫ్టీ 50 సూచీ కీలకమైన 200-రోజుల ఎక్స్పోనెన్షియల్ మూవింగ్ యావరేజ్ (డీఈఎంఏ) మద్దతు స్థాయి అయిన 24,050 పాయింట్ల దిగువకు చేరింది.
నిఫ్టీ 50 సూచీ నేటి ఉదయం 23,935 పాయింట్ల వద్ద నష్టాలతో ప్రారంభమైంది. ఆరంభంలో కొంత విలువ ఆధారిత కొనుగోళ్లు జరిగాయి, దాంతో 24,000 పాయింట్ల స్థాయికి చేరువగా వచ్చినప్పటికీ, 200-డీఈఎంఏ మద్దతు స్థాయి అయిన 24,050 పాయింట్ల దిగువనే ట్రేడ్ అవుతోంది. మరోవైపు, బీఎస్ఈ సెన్సెక్స్ 78,968 పాయింట్ల వద్ద నష్టాలతో ట్రేడింగ్ ఆరంభించి, ఇంట్రాడేలో మరింత కనిష్ఠ స్థాయిని తాకింది. అనంతరం 30 షేర్ల ఈ సూచీ కొంతమేర కోలుకుని 79,000 పాయింట్ల స్థాయిని తిరిగి అందుకుంది. అయినప్పటికీ, గత ముగింపుతో పోలిస్తే 800 పాయింట్లకు పైగా నష్టపోయి, సుమారు 79,925 పాయింట్ల వద్ద కొనసాగుతోంది. ప్రధాన బ్యాంకింగ్ షేర్లలో కూడా అమ్మకాలు వెల్లువెత్తాయి. బ్యాంక్ నిఫ్టీ సూచీ నేడు 53,595 పాయింట్ల వద్ద నష్టాలతో ప్రారంభమై, ట్రేడింగ్ మొదలైన కొద్దీ నిమిషాల్లోనే 53,525.50 పాయింట్ల కనిష్ఠ స్థాయికి పడిపోయింది.
స్టాక్ మార్కెట్ నిపుణుల అభిప్రాయం ప్రకారం, భారత స్టాక్ మార్కెట్లలో ఈ భారీ పతనానికి ప్రధానంగా ఐదు కారణాలున్నాయి. మొదటిగా, భారత్-పాకిస్థాన్ మధ్య వివాదం ఊహించిన దానికంటే తీవ్ర స్థాయికి చేరడం. రెండవది, బలహీనమైన అంతర్జాతీయ సంకేతాలు, మూడవది, అమెరికా డాలర్ విలువ పెరగడం, నాలుగవది, ముడిచమురు ధరలలో విలువ ఆధారిత కొనుగోళ్ల కారణంగా ధరలు పెరగడం, ఐదవది, భారత్-అమెరికా వాణిజ్య ఒప్పంద చర్చలలో స్పష్టమైన ఫలితం వెలువడకపోవడం.
