హెచ్-1బీ వీసా ఫీజు పెంపుతో భారత్ ఐటీకి తాకుడు; మన టెక్కీలకు బ్రిటన్ రెడ్ కార్పెట్
అమెరికా అధ్యక్షుడు ట్రంప్ తీసుకున్న హెచ్-1బీ వీసా దరఖాస్తు ఫీజును లక్ష డాలర్ల (సుమారు ₹83 లక్షలు)కు పెంచిన నిర్ణయం భారత ఐటీ రంగంలో తీవ్రమైన ఆందోళన కలిగిస్తోంది. ఈ నిర్ణయం భారత ఐటీ నిపుణుల అమెరికా కలను సవాలు చేస్తుందని నిపుణులు హెచ్చరిస్తున్నారు.
భారత ఐటీ పరిశ్రమకు అమెరికా మార్కెట్ వెన్నెముక లాంటి ప్రాధాన్యం కలిగి ఉంది, దేశ ఐటీ వ్యాపారం 57% అమెరికా ద్వారా జరుగుతోంది. గత ఏడాది జారీ అయిన హెచ్-1బీ వీసాలలో 71% భారతీయులే దక్కించుకున్నారు. తాజా ఫీజు పెంపుతో ఈ రంగంపై తీవ్రమైన ప్రతికూల ప్రభావం పడే అవకాశం ఉందని నిపుణులు అంచనా వేస్తున్నారు. జెన్సార్ టెక్నాలజీస్ సీఈవో గణేష్ నటరాజన్ వంటి నిపుణుల అభిప్రాయం ప్రకారం, ట్రంప్ ప్రభుత్వ నిర్ణయం భారత టెక్కీల అమెరికా అవకాశాలను మరింత సంక్లిష్టతగా మార్చింది. మరోవైపు, యాపిల్, మైక్రోసాఫ్ట్, మెటా వంటి సంస్థలపై స్థానికులకు ఉద్యోగాలు ఇవ్వాలంటూ వైట్హౌస్ ఒత్తిడి పెరుగుతోంది.
అమెరికా కఠిన నియమాలు విధిస్తుండగా, బ్రిటన్ పూర్తిగా భిన్న దిశలో పయనిస్తోంది. ప్రపంచంలోని అగ్రశ్రేణి ప్రతిభావంతులను ఆకర్షించేందుకు ప్రత్యేక ప్రణాళికలు రూపొందిస్తోంది. సైన్స్, టెక్నాలజీ నిపుణుల కోసం వీసా ఫీజును పూర్తిగా రద్దు చేసే యోచనలో బ్రిటన్ ప్రభుత్వం ఉందని అంతర్జాతీయ మీడియా కథనాలు వెల్లడిస్తున్నాయి. ప్రధాని కీర్ స్టార్మర్ నేతృత్వంలో "గ్లోబల్ టాలెంట్ టాస్క్ఫోర్స్"ను కూడా ఏర్పాటు చేశారు. భారత ఐటీ రంగం, వర్క్ వీసాలు, సాఫ్ట్వేర్ ఔట్సోర్సింగ్, వ్యాపార సేవల రూపంలో $283 బిలియన్ (₹25 లక్షల కోట్లు) వ్యాపారం చేస్తుంది. ఈ పరిణామాలతో అమెరికా వీసా మార్పులు దీనిపై తీవ్ర ప్రభావం చూపవచ్చని నిపుణులు సూచిస్తున్నారు.
భారత్ టెక్కీలకు బ్రిటన్ ఆశాకిరణం
ఒకవైపు అమెరికా హెచ్-1బీ ఫీజు పెంచి షాక్ ఇస్తుంటే, మరోవైపు బ్రిటన్ ప్రతిభావంతులకు రెడ్ కార్పెట్ పరుస్తోంది. భవిష్యత్తులో భారత ఐటీ నిపుణులు అమెరికా స్థానంలో బ్రిటన్ వైపు ఎక్కువగా చూస్తారని విశ్లేషకులు భావిస్తున్నారు.
