పాకిస్థాన్ సూపర్ లీగ్ (పీఎస్ఎల్) మిగిలిన మ్యాచ్‌లను యునైటెడ్ అరబ్ ఎమిరేట్స్ (యూఏఈ)లో నిర్వహించాలన్న పాకిస్థాన్ క్రికెట్ బోర్డు (పీసీబీ) ప్రణాళికకు గట్టి అడ్డంకి ఎదురైంది. భారత్-పాకిస్థాన్ మధ్య ఉద్రిక్తతలు తీవ్రంగా ఉన్న తరుణంలో, ఎమిరేట్స్ క్రికెట్ బోర్డు (ఈసీబీ) పీఎస్ఎల్‌కు అనుమతి ఇవ్వడానికి ఆసక్తి చూపడం లేదు అనే విశ్వసనీయ సమాచారం వెలుగుచూసింది.
బీసీసీఐతో బలమైన బంధమే ప్రధాన కారణం
పీఎస్ఎల్‌ను యూఏఈకి తరలిస్తున్నట్టు పీసీబీ ప్రకటించినప్పటికీ, ఈసీబీ వర్గాలు భద్రతాపరమైన సమస్యల్ని ప్రస్తావిస్తూ తీవ్ర ఆందోళన వ్యక్తం చేశాయి. ఇలాంటి పరిస్థితుల్లో పీసీబీకి మద్దతుగా కనిపించటం ఎసిబీకి ఇష్టం లేదని తెలుస్తోంది.
ఇటీవలి కాలంలో ఎసిబీకి భారత క్రికెట్ నియంత్రణ మండలి (బీసీసీఐ)తో బలమైన సంబంధాలున్నాయి. గతంలో ఐపీఎల్ పలు సీజన్లు, టీ20 వరల్డ్ కప్ 2021 (ఇండియా ఎడిషన్) మ్యాచ్‌లు, రాబోయే ఐసీసీ ఛాంపియన్స్ ట్రోఫీ వంటి టోర్నీలకు యూఏఈ ఆతిథ్యమిచ్చింది. దుబాయ్‌లో ఉన్న ఐసీసీ ప్రధాన కార్యాలయం ప్రస్తుతం జై షా నేతృత్వంలోని బీసీసీఐ వర్గాల అధీనంలో ఉంది.
దక్షిణాసియా దేశాల ప్రజలు అధిక సంఖ్యలో నివసిస్తున్న యూఏఈలో పీఎస్ఎల్ నిర్వహణ వల్ల సామాజిక సమస్యలు తలెత్తే అవకాశముందని ఈసీబీ వర్గాలు అభిప్రాయపడుతున్నాయి.
పీఎస్ఎల్ నిరవధిక వాయిదా — పీసీబీ ప్రకటన
యూఏఈకి మ్యాచ్‌లను తరలిస్తామని ప్రకటించిన కొద్ది గంటల్లోనే, పీసీబీ పీఎస్ఎల్‌ను నిరవధికంగా వాయిదా వేస్తున్నట్టు ప్రకటించింది. భారత్‌తో నెలకొన్న సైనిక ఉద్రిక్తతల నేపథ్యంలో ఈ నిర్ణయం తీసుకున్నట్టు తెలిపింది.
"దేశ సార్వభౌమత్వాన్ని కాపాడేందుకు పాకిస్థాన్ సాయుధ బలగాలు ధైర్యంగా పోరాడుతున్నాయి. వారి ప్రయత్నాలను గౌరవిస్తూ, ప్రధానమంత్రి షాబాజ్ షరీఫ్ సూచన మేరకు పీఎస్ఎల్ వాయిదా వేయబడింది," అని పీసీబీ తెలిపింది. అమరవీరుల కుటుంబాలకు, భద్రతా సిబ్బందికి పూర్తిస్థాయి మద్దతుగా నిలుస్తామని కూడా పేర్కొంది.
ఇదే తరహాలో బీసీసీఐ కూడా సరిహద్దు ఉద్రిక్తతల కారణంగా ఐపీఎల్ మిగిలిన మ్యాచ్‌లను రద్దు చేయడం గమనార్హం. ఈ పరిణామాలన్నీ క్రికెట్‌పై రాజకీయ ప్రభావం ఎంత తీవ్రమైందో తెలియజేస్తున్నాయి.
