ప్రముఖ హీరోయిన్ సమంత, నటిగా తనదైన ముద్ర వేయడంతో పాటు ఇప్పుడు చిత్ర నిర్మాణ రంగంలోకి అడుగుపెట్టారు. తన స్వంత నిర్మాణ సంస్థ ‘ట్రా లా లా మూవింగ్ పిక్చర్స్’ పతాకంపై నిర్మించిన తొలి చిత్రం ‘శుభం’ మే 9న ప్రపంచవ్యాప్తంగా విడుదల కానుంది. ప్రవీణ్ కండ్రేగుల దర్శకత్వం వహించిన ఈ సినిమాకు సంబంధించిన మీడియా సమావేశంలో సమంత నిర్మాతగా చేసిన మొదటి ప్రయాణం గురించి ఆసక్తికర విషయాలు పంచుకున్నారు.
నిర్మాతగా కొత్త అనుభవాలు:
"నటిగా ఉన్నప్పుడు మన బాధ్యత ఒక పాత్ర వరకే పరిమితమవుతుంది. కానీ నిర్మాతగా మారిన తర్వాత ప్రతి చిన్న అంశం మనదే అవుతుంది. ఒక్క సన్నివేశం అనుకున్నట్లుగా రాకపోయినా, పునఃచిత్రీకరణ జరగాల్సి వచ్చినా ఎంత సమయం, డబ్బు వృథా అవుతుందో ఇప్పుడు స్పష్టంగా తెలిసింది. ప్రతి నిమిషం, ప్రతి రూపాయి ఎంతో విలువైనదని ఈ ప్రయాణంలో గ్రహించాను" అని సమంత చెప్పారు.
"గతంలో రీషూట్ అనగానే తేలికగా భావించేదాన్ని. ఇప్పుడు నిర్మాతగా అవే చిన్న విషయాలు పెద్ద పరిణామాలు కలిగించగలవని తెలుసుకున్నాను. లొకేషన్ ఖర్చులు, యూనిట్ ఖర్చులు, టైమ్ మేనేజ్మెంట్ అన్నీ ఎంతో జాగ్రత్తగా చూసుకోవాల్సిన అవసరం ఉందని గుర్తించాను" అని వివరించారు.
కథకు ప్రాధాన్యత – కొత్తవారికి అవకాశాలు:
గౌతమ్ వాసుదేవ్ మీనన్ తనకు నటిగా మొదటి అవకాశం ఇచ్చినట్లే, తాను కూడా కొత్త ప్రతిభను ప్రోత్సహించాలనే ఉద్దేశంతో నిర్మాణ రంగంలోకి వచ్చానని సమంత చెప్పారు. ‘శుభం’లో శ్రియా, శ్రావణి, షాలిని వంటి కొత్త నటీమణులకు అవకాశం ఇవ్వడం తనకెంతో సంతృప్తినిచ్చిందని తెలిపారు. వసంత్ అందించిన కథ ఒక సామాజిక సెటైర్గా సీరియల్స్ నేపథ్యంలో రూపొందించబడిందని, ఇది అన్ని వయస్సుల ప్రేక్షకులకు నచ్చేలా ఉంటుందని విశ్వాసం వ్యక్తం చేశారు.
"బడ్జెట్ విషయంలో కథకు అవసరమైన మేరకే ఖర్చు చేసాం. అనవసరంగా ఆర్భాటాలకు పోకుండా, కథే ప్రధానంగా నిలుస్తుందనేది మా ఉద్దేశం" అని చెప్పారు. కుటుంబ సమేతంగా చూసేలా రూపొందించిన ఈ చిత్రాన్ని ప్రేక్షకులు ఆదరిస్తారనే ఆశాభావం వ్యక్తం చేశారు.
