ఇ-పాస్‌పోర్ట్ అంటే ఏమిటి? ఎలా పనిచేస్తుంది? | చిప్‌తో కొత్త పాస్‌పోర్ట్‌లు

దేశవ్యాప్తంగా ఈ-పాస్‌పోర్ట్‌లు

భారత ప్రభుత్వం పాస్‌పోర్ట్ సేవా ప్రోగ్రామ్ 2.0 (PSP 2.0) ద్వారా దేశవ్యాప్తంగా చిప్‌తో కూడిన ఈ-పాస్‌పోర్ట్‌లు అందుబాటులోకి తీసుకొచ్చింది. ఇప్పటివరకు కొన్ని నగరాల్లో మాత్రమే పైలట్ ప్రాజెక్ట్‌గా అందుబాటులో ఉన్న ఈ సేవలు ఇక ప్రతీ పౌరునికీ అందుబాటులో ఉంటాయి. విదేశాంగ శాఖ మంత్రి ఎస్. జైశంకర్ 13వ పాస్‌పోర్ట్ సేవా దినోత్సవం సందర్భంగా ఈ కీలక ప్రకటన చేశారు.

ఆధునిక టెక్నాలజీతో వేగవంతమైన సేవలు

మంత్రి మాట్లాడుతూ, “పౌర సేవలను మెరుగుపరచడం కోసం అత్యాధునిక టెక్నాలజీతో PSP 2.0 ప్రారంభించాం. ఇది 'సేవ, సుశాసన, గరీబ్ కల్యాణ్' లక్ష్యాలతో ముందుకు సాగుతోంది. ఈ పద్ధతి డిజిటల్ ఇండియా అనుభవాన్ని పౌరులకు అందిస్తుంది. ఈ-పాస్‌పోర్ట్‌ల వల్ల ఇమ్మిగ్రేషన్ వేగంగా, మోసాలకు అడ్డుకట్ట పడుతుంది" అని తెలిపారు.

ఈ-పాస్‌పోర్ట్ అంటే ఏమిటి? ఎలా పనిచేస్తుంది?

ఈ-పాస్‌పోర్ట్ అనేది సాధారణ పాస్‌పోర్ట్‌కు తోడు ఒక ఆర్ఎఫ్ఐడీ చిప్ కలిగి ఉంటుంది. ఈ చిప్‌లో పాస్‌పోర్ట్ దారుడి వివరాలు, ఫోటో, వేలిముద్రలు వంటి బయోమెట్రిక్ సమాచారం ఉంటాయి. పాస్‌పోర్ట్ కవర్‌పై బంగారు రంగు చిహ్నం ఉండడం ద్వారా ఇది గుర్తించవచ్చు. ఎయిర్‌పోర్ట్‌లో చిప్ స్కానింగ్ ద్వారా వేగంగా ధృవీకరణ జరుగుతుంది.