వాట్సాప్ను అధిగమించి నెంబర్ 1 స్థానానికి చేరిన స్వదేశీ యాప్ అరట్టై. ప్రభుత్వ ప్రోత్సాహం, ‘మేడ్ ఇన్ ఇండియా’ నినాదంతో యాప్ భారీగా డౌన్లోడ్ అవుతోంది. వినియోగదారుల ఉత్కంఠ వలన సర్వర్లపై తీవ్ర ఒత్తిడి ఏర్పడింది, సాంకేతిక సమస్యలు ఎదురయ్యాయి. యాప్ స్పైవేర్ రహితంగా, యూజర్ల డేటాకు భద్రత ఉన్నట్లు కంపెనీ హామీ ఇస్తోంది.
భారత మార్కెట్లో అరట్టై సంచలనం సృష్టిస్తోంది. ప్రముఖ మెసేజింగ్ దిగ్గజం వాట్సాప్ను వెనక్కి నెట్టి, పూర్తిగా స్వదేశీ పరిజ్ఞానంతో రూపొందించిన అరట్టై యాప్ యాపిల్ యాప్ స్టోర్లో సోషల్ నెట్వర్కింగ్ విభాగంలో నెంబర్ 1 స్థానం అందుకున్నట్లు మాతృసంస్థ జోహో ఎక్స్ ప్లాట్ఫామ్లో ప్రకటించింది. ఒక్కసారిగా దేశవ్యాప్తంగా యాప్ మీద ఆసక్తి పెరిగింది.
ఎందుకు ఈ ఆదరణ?
2021లో ప్రారంభమైన అరట్టై పేరు తమిళంలో ‘కబుర్లు’ అని అర్థం. ఇటీవల కేంద్ర విద్యాశాఖ మంత్రి ధర్మేంద్ర ప్రధాన వంటి ప్రముఖులు స్వదేశీ డిజిటల్ ప్లాట్ఫామ్లను ప్రోత్సహించారని పిలుపునివ్వడంతో యాప్ కి లాభం వచ్చింది. అదనంగా ‘స్పైవేర్ రహిత – మేడ్ ఇన్ ఇండియా’ నినాదం వినియోగదారులను ఆకర్షించింది. దేశభక్తి మరియు డేటా భద్రతను ప్రాధాన్యం ఇచ్చే యూజర్లు పెద్ద సంఖ్యలో యాప్ను డౌన్లోడ్ చేసుకున్నారు. టెక్ వ్యాపారవేత్త వివేక్ వాధ్వా కూడా ఈ యాప్ను ‘ఇండియాస్ వాట్సాప్ కిల్లర్’ అని ప్రశంసించాడు.
విజయం వెనుక సవాళ్లు
వినియోగదారుల హఠాత్ వృద్ధి వలన సర్వర్లపై ఒత్తిడి పెరిగింది. దీనివల్ల ఓటీపీలు ఆలస్యంగా రావడం, కాంటాక్ట్స్ సింక్ కాకపోవడం, కాల్స్ సమస్యలు వంటి ఇబ్బందులు ఎదురయ్యాయి. జోహో ఈ సమస్యలను గుర్తించి, సర్వర్ల సామర్థ్యాన్ని పెంచేందుకు కృషి చేస్తున్నట్లు, సమస్యలను సరిదిద్దడానికి రెండు రోజులు పడవచ్చని తెలిపింది.
ప్రస్తుతం అరట్టై యాప్లో ఆడియో, వీడియో కాల్స్కు మాత్రమే ఎండ్-టు-ఎండ్ ఎన్క్రిప్షన్ ఉంది. వాట్సాప్లాగా చాట్లకు భద్రతా ఫీచర్ ఇంకా అందుబాటులోకి రాలేదు. త్వరలోనే ఈ ఫీచర్ను అందుబాటులోకి తీసుకురావనున్నట్లు కంపెనీ చెబుతోంది. ఈ భద్రతా లోపం ఉన్నప్పటికీ, స్వదేశీ యాప్ కావడం, యూజర్ల డేటాను వ్యాపారానికి ఉపయోగించరని హామీ ఇవ్వడం వంటి అంశాలు అరట్టైకి సానుకూలంగా మారాయి. సాంకేతిక సమస్యలను అధిగమించి, ఈ ఆదరణను నిలిపుకుంటే, అరట్టై దీర్ఘకాలంలో వాట్సాప్కు నిజమైన పోటీదారుగా నిలవగలదు.
