ఏపీ ప్రభుత్వం: అంగన్వాడీల్లో 4,687 సహాయకుల నియామకాలకు గ్రీన్ సిగ్నల్
రాష్ట్రంలో అంగన్వాడీ సేవలను మరింత బలోపేతం చేయడానికి ఏపీ ప్రభుత్వం కీలక నిర్ణయం తీసుకుంది. తాజాగా పూర్తిస్థాయి (మెయిన్) అంగన్వాడీ కేంద్రాలుగా అప్గ్రేడ్ అయిన 4,687 కేంద్రాల్లో సహాయకుల (హెల్పర్ల) పోస్టుల భర్తీకి అనుమతి తెలిపింది.
శుక్రవారం మహిళా, శిశు సంక్షేమ శాఖ ఉత్తర్వులు జారీ చేస్తూ నియామక ప్రక్రియను వెంటనే ప్రారంభించాలని అధికారులకు ఆదేశాలు ఇచ్చింది. త్వరలోనే ఈ పోస్టుల భర్తీకి నోటిఫికేషన్ విడుదలయ్యే అవకాశం ఉంది.
ప్రతి కేంద్రానికి ఒక సహాయకురాలిని నియమించాలనే నిర్ణయం తీసుకోగా, పదో తరగతి విద్యార్హతగా నిర్ణయించే అవకాశం ఉంది.
అలాగే, ఇప్పటివరకు మినీ అంగన్వాడీ కార్యకర్తలుగా పనిచేస్తున్న 4,687 మందికి ప్రభుత్వం పదోన్నతులు కల్పించింది. వీరిని పూర్తిస్థాయి అంగన్వాడీ కార్యకర్తలుగా గుర్తించి, వారి నెలవారీ గౌరవ వేతనాన్ని ₹11,500కు పెంచింది.
ఈ నియామకాలు, పదోన్నతులతో అంగన్వాడీ సేవల పనితీరు మరింత మెరుగవుతుందని అధికారులు భావిస్తున్నారు.
